واشنګټن پوسټ: که کرزی د انتخاباتو دوهم پړاو و نه مني
سرچینه: واشنګټن پوست امریکایۍ ورځپاڼه
ژباړه او ترتیب: میرویس جلالزی
د واشنګټن پوست امریکایۍ ورځپاڼې د روانې میاشتې د اتلسمې نیټې په ګڼه کې د افغانستان له انتخاباتو څخه د رامنځ ته شوي سیاسي بحران په اړه یوه لیکنه خپره کړي ده.
په لیکنه کې د هغو یو شمیر لویدیځ والو او په خاصه توګه امریکایې چارواکو اندیښنو ته اشاره شوي چې د انتخاباتو د نتایجو په اړه یې د ولسمشر کرزي له احتمالي غبرګون څخه لري.
یو شمیر امریکایې مقاماتو واشنګټن پوست ته ویلي چې په قوي احتمال به د افغانستان انتخابات دوهم پړاړ ته ولاړ شي او ښایې د حامد کرزي غبرګون دا وي چې د انتخاباتود کمیسیون پریکړې ته غاړه کینږدي.
ورځپاڼه لیکي چې امریکایې لوړ پوړي چارواکې ګمان کوي چې انتخابات به د شویو درغلیو په سبب دوهم پړاو ته ولاړ شي او دوه مخکښ کاندیدان حامد کرزی او ډاکټر عبدالله عبدالله به د دوهم ځل لپاره سره سیالي وکړي.
واشنګټن پوست لیکي چې که حامد کرزی د انتخاباتو بیا ځلي تر سره کیدو ته غاړه کینږدي نو په افغانستان کې به یو ژور سیاسې کړکیچ ته لاره هواره شی یوازي د کابل حکومت ته نه بلکه امریکې ته به هم سخت زیان ورسوي.
د ورځپاڼې په باور چې د امریکې د متحده ایالاتونو ولسمشر په داسي حال کې د افغانستان جګړې ته د نورو سرتیرو د استولو په غوښتنه فکر کوي چې په دغه هیواد کې د انتخاباتو پر سر را پورته شوي ناندرۍ اوس خپل خطرناک پړاو ته رسیدلي او که چیرته حامد کرزی د انتخاباتو د دوهم پړاو له تر سره کیدو سره مخالفت وکړي ښایې امریکا هم په افغانستان کې د خپل ښکیلتوب لویه بیه پرې کړي
