لیکوال : اریک مارګولیس
منبع : ټورنټوسن ورځپاڼه ( کاناډا )
نېټه : ۲۰۰۹/۱۲/۲۰
فساد او امریکایی ضد خښم دا ناکراره هېواد ټوټې ټوټې کوی
زما د دفتر پر دېوال د وروستیو څلورو پاکستاني مشرانو عکسونه ځړیږی . له هغوی نه دوه یې ، یعنی ضیأالحق او بېنظیر بوټو وژل سوي دي . پخوانی صدراعظم نواز شریف د څلورم عکس والا یعنی جنرال پرویز مشرف لخوا د یوې پوځی کودتا پواسطه وشړل سو ، حال دا چی هغه بیا پاکستاني پوځ د یوې آرامی خو روانی کودتا په ذریعه پسی ایسته کړ .
تر دغو عکسونو لاندی دغسی لیکلي دي : زه به یو بد چانسه انسان یم او یا دا چی د پاکستان رهبری کول به مخته نسی وړل کېدای .
دا دﺉ واشنګټن باالاخره هلته هغه دیموکراسي حاصله کړه چی د پاکستان لپاره یې غوښته ، یعنی هغه څه چی د ټولو معکسو پایلو مور ګڼل کیږی . ما د پاکستان د اوسني ولسمشر آصف علی زرداری یعنی د بې نظیر بوټو د میړه سره هیڅکله نه دي لیدلي ، خو د لسیزو راهیسی می د فساد د هغو تورونو په هکله لیکلي چی د سیوری غوندی هغه تعقیبوی . زرداری له هغه راهیسی په « ښاغلي ۱۰٪ » سره شهرت لری چی د خپلی میرمنی په حکومت کی شامل و ، او د حکومتی قراردادونو د منظورۍ مسؤلیت یې درلود .
واشنګټن په ۲۰۰۸ کی هڅه وکړه چی د مشرف ډوبېدونکې دیکتاتوري یې پر هر چا د ګراني بېنظیر بوټو په معتقد کولو سره داسی ژغورلې وای چی نوموړې به یې د پوځی واک په وړاندی د یو دیموکراتیک بادوان په توګه دروله . د هغې بیه دا وه چی د دې او مېړه پر ضد به یې د فساد اوږد لیست معافېدﺉ .
امریکا او برتانیې په آرامه او ډاډمنه توګه د بوټو د کهول او د هغوی د متهمو زرګونو ملاتړو ( او نورو سیاسی څیرو ) پر ضد د معافۍ ترتیبات ونیول . خو بی نظیری تر خپل وژل کېدو لږ څه مخکی ماته وویل چی د مشرف کست کاره ( حاسد ) ملګري غواړی چی ما ووژنی .
آصف زرداري ته وروسته د پاکستان د ټولو نه غټ یعنی خلکو د ګوند مشري په میراث کی ورسېده . دﺉ د امریکا د ټینګ سیاسی او مالی ملاتړ په برکت ولسمشر سو . زرداری په عوض کی د امریکا څخه په افغانستان کی د هغوی د جنګ ننګه وکړه او پنتاګون ته یې اجازه ورکړه چی د پاکستانی اډو او پرسونلو استعمال ته ادامه ورکړی . واشنګټن هم د لږ تر لږه ۸ بلیونو ډالره د ورکړی ژمنه ورسره وکړه .
خو دغه اومړې او نازکه معامله اوس ځکه په اوبو کی لاهو کېدونکې ښکاری چی د پاکستان تازه او نوی مګر غیر احتمالی دیموکراتیک اتل ، یعنی د ستری محکمې لوی قاضی افتخار چودری د هغه د فساد تورونه بیرته قانونأ راپورته کړي دي .
دا صحیح ده چی زرداری د جنایی تورونو پر خلاف د ولسمشرۍ د مقام لرلو په وجه خلاص دی ، خو د ده نږدې ملګري چی هماغه د رژیم بدنامه پیاوړي کسان دي ، لکه داخله وزیر رحمان ملِک او د دفاع وزیر احمد مختار د قانونی تعقیب سره مخامخ دي . دا دواړه کسان په افغانستان کی د امریکا د پوځی عملیاتو ، د امریکا لخوا د پاکستاني اډو د کارولو او هم د خپلو پښتني قبایلو پر ضد د پاکستان د جنګ اصلی مرستندویان او عاملان دي .
مخالف ګوندونه د زرداری او د هغه د لویو ملګرو استعفأ غواړی . اسلام آباد د هغه څه پر خلاف د ښورښ او بلوا په حال کی دی چی واشنګټن پاکستانی حکومت ته دا اړتیا لری چی په اصطلاح د پاکستانی طالبانو پرضد خپل جنګ نور هم شدید کړی ، په افغانستان کی د امریکا د زیاتېدونکو پوځی هڅو ملاتړ وکړی او د پاکستان په دننه کی د بې پیلوټه طیارو حملې نوري هم زیاتی او سختی کړی .
هو ، د مړو هډوکي د زرداری تر المارۍ دباندی نڅا کوی ، یعنی لومړی دا چی د ده ۶۳ ملیونه ډالره غیر قانونی پس لغتی او کمیشنونه د بوټو والو لخوا د سویس بانک په حسابونو کی ساتل سوي دي ، دوهم دا چی د زرداری اټکل دوه بلیونه خپل ډالرونه ، درېیم دا چی په امریکا ، فرانسه ، هسپانیه او برتانیه کی ښکلي او عصری ودانۍ او تعمیرونه او ډیر نور جایداد شتون لری .
زرداری د فساد د تورونو له امله په پاکستان کی ۱۱ کاله بندی و ، چی بی نظیری به ادعا کوله چی دا ټول سیاسی لمسونونه وو . ده په سویس کی په دې ادعا سره چی ګواکی دماغی تکلیف لری ، ځان د محاکمې څخه خلاص کړ .
د بوټو کهول په پاکستان یعنی هغه مسکین هېواد کی بیا هم تر ټولو غټ فیوډالان ( لوی مځکه وال ) دي چی سړي سر کالنی عاید یې ۱۰۲۷ ډالره او د بېسوادۍ کچه یې هم تر ۵۰٪ جګه ده . پاکستان په ۱۹۴۷ کی د خپل جوړښت راهیسی د نازړه سویه فیوډالانو یعنی هغو کسانو لخوا رهبري سوﺉ چی سیاست مداران د باسمتی وریجو د بوریو ( کڅوړو ) غوندی رانیسی او خرڅوی ، او یا هم د جنرالانو لخوا اداره کیږی .
د زرداری یعنی په اسلام آباد کی د واشنګټن د نفر ورځي مخ پر ختمېدو دي . امریکایی ضد خښم په دې ټولیزه ادعا ګانو سره مسلسل ډیریږی چی وایی پاکستان د امریکا لخوا « اشغال سوی » دی ، د یو درېیمه درجه استثماری زراعتی هېواد غوندی کړنه ورسره کیږی ، او د امریکا لخوا د نصب کړو فاسدو ګوډاګیانو لخوا رهبری کیږی .
ډیر پاکستانیان د خپل هېواد روانه خونړۍ بم وري د دوو خواوو لمسون بولی چی هغه د « زي » ( یعنی پخوانی بلېک واټر ) امریکایی اجیرانو او خپل پخوانی غلیم یعنی هند انتقامی حملې دي .
اکثریت پاکستانیان په دې نظر دي چی واشنګټن غواړی د دوی بی ثباته هېواد تجزیه کړی تر څو په دې ډول د هغه پر اټومی وسلو غېږ راوګرځوی .
واشنګټن خو همدا اوس د سرکښه او پارېدلی پاکستان پر لومړۍ کرښه ولاړ دی . که زرداری له مخی لیری سی ، او یا هم د یو بی کفایته تش په نوم مشر په حیث بالاخانې ته وشړل سی ، نو عامه پاملرنه به د پاکستان ۶۱۷۰۰۰ کسیزه پوځ او د هغه قوماندان جنرال ـ او کېدای سی « انتخابی ولسمشر ؟ » یې هم وبولو ـ یعنی اشفاق کیانی ته واوړی .
دا چی موږ ۲۰۱۰ کال ته رسېدونکي یو ، نو د « افپاک » کرغیړنه نوموَنه به د بارک اوباما سپینه ماڼۍ کټ مټ د جنرال مک آرتر د هغه عاقلانه خبردارې غوندی ځوروی ، سربداله کوی او نینوی چی په جاهلانه توګه په باک نه وه راوړل سوې یعنی دا چی : په آسیا کی د ځمکنۍ جګړې څخه ډډه وکړﺉ . پای
