څه خو به ؤ چې ما وفا پریښوده
ما چې نیولې لمن ستا پریښوده
ښه پوهیدم سر په ویرونو به شم
ښه خود آګاه مې دا خندا پریښوده
دې بې رخۍ ته مجبورۍ اړایستم
څه نارضا مې په رضا پریښوده
هر څه بهر مې کړ د زړه له چمه
ځانته مې ځانله ستا سودا پریښوده
نور سپیناوي ته حاجت پاته نه شو
نه مې مدعی نه مې مدعا پریښوده
ټول مې راټول کړ ستا د لارو اغزی
درته بیخاره مې دنیا پریښوده
شونډی مسکۍ شوې سترګو وژړیلې
یو په سلا بــــل نا ســــــلا پریښوده
الهام او زړه لاس او ګریوان شو عشق کې
و وایی تــــا بل وایی نــه تا پریښوده
