ستا غوټۍ به سره ګلان شي زه به نه یم
ستا بچــــــوڼي به ځوانان شي زه به نه یم
ارمانجن د خـــــــــپلواکۍ به درنه لاړ شم
بریالي به دي غــــــــازیان شي زه به نه یم
د ښکیلګرو به ټــــــــغر در څخه ټول شي
ویجاړ کـور به دې ودان شي زه بـه نه یم
په دولت کې به نـــه دوـ وي نـه به لت وي
ورک به واړه خـــــــــــــاینان شي زه به نه یم
ادارو کې به هیڅوک بـــــــــــــــډې وانخلي
حاکمان به خـــــــــــــــادمان شي زه به نه یم
د یو حق به په رشوت بـــــــل ته ور نکړي
پاک له بډو به قـــــاضیان شي زه به نه یم
نه به غله وي نه بـــه لارو کې پــــــاټک وي
هم ډاډمن به دې کاروان شي زه به نه یم
وچـــــــکالي به پر تا تـــــــــــېره شي هېواده!
مهـــــــــــــربانه به اســـــــمان شي زه به نه یم
د پردیو له اړتـــــــــــــیاوو نه به خلاص شي
پخپل مټ به افـــــــــغانان شي زه به نه یم
بیا به جــوړې نندارې جـوړې مېلې شي
خــــــــلک ټــول بـه ور روان شي زه به نه یم
په مــــخلص به خروارونه خاورې بار وي
خلک ټول به مـــــــخلصان شي زه به نه یم
