د خـــــزان باده

د خــزان بـاده! د لوی مولا په حکم
ظالمان او خــاینان پاس په هـوا کړه
د اسمان لـه نیــمایي نه یې پر ځمکه
پښې مخ پورته سرچپه بیرته خطاکړه
چې هـډوکي یې پرځمکه پـیدا نشي
او پرغـوښو یې ماړه سپي د بیدیاکړه
لږ د سولې رڼــــا هـم در سره راوړه
د جنـګونـو دا اوږده شپه مو سبا کړه
د خــــــزان باده! را والـوزه په زوره
راشه ځان سره یو داسې طوفان راوړه
چې د کلي زوره ور په کې لاهوشي
پرهمدوی باندې تل پاتې خـزان راوړه
چې بیا بوټی یې را شین نه شي پرځمکه
دوی ته داسې یو درمل اوسامان راوړه
مونږ لدې نـاترسو خلکو څخه خلاص کړه
او پر ځای یې مونږ ته ښکلي کسان راوړه
د خـــزان بــاده! ګلان چې رژوې ته
دا اغـــــــزې هم لدې بڼه لــولپه کړه
چې د خلکو وینې څکې او نه مړېږي
د لرګي په شان په اورکې یې لمبه کړه
چې مونږ وژنې پاچایي ځان لره غواړي
تاج او تخت د پاچاهۍ یې را چپه کړه
چې دحق ستونی اوغږخفه کوي څوک
د مخلص د دښــــــمنانو غږ خفه کړه