په نارو چي دتکبير دي خپل پاڅون کړه
ستا په لاس قدرت روسان واړه زبون کړه
هرمحاذ کي دي نصيب فتح نصرت وو
دالحاد په وړاندي تا چي اوښتون کړه
تندر،تالنده دښمن ته ښکارېدلې
سهاربرېد چي په تياره به دي شبخون کړه
په لړزه دي له هيبته شرق او غرب وو
يهوديت اونصرانيت دي په افسون کړه
شهادت ته دي لبيک لبيک ويلو
ځان په وينو دي خاټول،لاله زرغون کړه
انديښنې دمرګ اوژوبلي تښتيدلې
غر،ميره،کلی اوښار چي تاګلګون کړه
توپ وټانک اوطياره درته وې ټوکي
نابودۍ ته يې چي تا يوو ځل تړون کړه
جرنيلان دي وتدبير ته په حيرت وه
ډګري سوبو دي لوی،واړه مفتون کړه
اوس هم هغه قهرمان يې بسم الله کړه
دغليم په وړاندي صف دپيوستون کړه
٢،جنوري،١٩٩٣ متحده ايالات،کلفورنيا
