دیومهاجرې پیغلې او ځوان د وطن خاطري
پیغله
کاشکې د وطن باغو ته تللې وای
ګلو لمن ډکه ترې راغلې وای
ځوان
ښکلی کابل جان کې ښه باغونه دي
هر لورته یې ښکلي منظرونه دي
باغ د بابر شاه کې ګرځیدلای وای
ګلو لمن ډکه ترې راغلای وای
پیغله
لاړه وای پغمان خیالي درو ته بیا
ناسته یې وای ښکلو منظرو ته بیا
ګل مې په اوربل باندې ټومبلای وای
ګلو لمن ډکه ترې راغلې وای
ځوان
ښکلی ښه باغونه قندهار لري
خوند یې ښه انګور او سره انار لري
بیا په چهل زینو ورته ختلای وای
ګلو لمن ډکه ترې راغلای وای
پیغله
تللې شاهي بڼ ته ننګرهارپه لور
هلته د شهید امیر مزار په لور
هار مې د نارنج د ګل جوړ کړای وای
ګلو لمن ډکه ترې راغلې وای
ځوان
ښکلی دی مزار د شنه باغو سره
ښه ښکاری روزه د ګنبدو سره
سوال مو دایمان الله ته کړی وای
ګلو لمن ډکه ترې راغلای وای
پیغله
لاړه شهدا ، تمیم انصارته وای
نا سته د افغان سعید مزار ته وای
بیا مو د دوعا لاس پورته کړای وای
ګلو لمن ډکه ترې راغلای وای
ځوان
لاړ وای د پروان ښایسته باغونو ته
بیا د استالف ښه منظرونو ته
یخې د چینو اوبه مو څکلای وای
ګلو لمن ډکه ترې راغلای وای
پیغله
لاړ وای مهتر لام بابا زیارت ته بیا
لاس وای په دوعا د خدای رحمت ته بیا
نظر مې د سوال په ځان منلې وای
ګلو لمن ډکه ترې راغلې وای
ځوان
ښه ښکاري وطن شینکي باغو سره
خوند کړي افغاني کلو بانډو سره
بیا عمرزیو په لارو تللای وای
ګلو لمن ډکه ترې راغلای وای
-----------------------------------
۲۰ -۱۱ -۲۰۱۲
