دخپریدو نیټه : 2013-04-16 مخپرونکئ : 098 - دبېنوا اداره - کابل
غاړه نه ږدي
لينا احمد
دا چا ویل چې هغه زما یارۍ ته غاړه نه ږدي
هغه خوزما پرته زندګۍ ته غاړه نه ږدي
د خپلې بې وسۍ اغزي مې سترګو کی غړیږي
مین په خپله خوښه جدایۍ ته غاړه نه ږدي
دا ستر ګې خو نادانې دي چې حال د زړګي وایي
ګنې دلته څوک په خپله رسوایۍته غاړه نه ږدي
په سر یې ستا لپاره ځکه اور دلته بل کړی
دا شمع په تیرو کې تنهایۍ ته غاړه نه ږدي
د ې زړه خو مې د سر په قیمت تاته در کتلي
نادان دی چې د مینې ارزانۍ ته غاړه نه ږدي
دا تا د لينا زړه په اسانۍ څنګه را خپل کړ
بې زوره زوروره خو نړۍ ته غاړه نه ږدي
