زه دې هم خوب کله ارمان کې وینم
کله دې لمر په شین اسمان کې وینم
کله قفقاز د ښکلا ګانو په چم
یو ځوان هوس دې په روان کې وینم
ښکلی انځور دې د کوچیانو میره
زه دې دمینې په کاروان کې وینم
لار د راتلو دې زه مدام څارمه
کله دې ستورو کهکشان کې وینم
کله غصه کله مسکا عوندې شې
کله دې لمرکله باران کې وینم
زما ای ښکلې زرورینې اشنا
زه دې ښکلا رنګین جهان کې وینم
رب دې شیبه هم خوب د ځنډه مکړه
چې دې خوبونه پریشان کې وینم
دا ستا دیدن به رب نصیب کړي زما
فال دې رحمان بابا دیوان کې وینم
-------------------------------
۷ - ۷ - ۲۰۱۳
م کال
