ژوند ځپلې ارواح

ساحل       كندهار        15\7\83

ژوند ځپلې ارواح

و وايه  ژونده! هغه به كومه ورځ وي چي نور مي نو دا بې رنګه او بې معنى څېره  د دې بې درده او بې ارمانه انسانانو له منځه فناه شي؟

ژونده نور نو زما او ستا تر منځ د  پيوستون كومي اړيكي نشته او نه هم د خپل خوار زړه هيلي په تا كي ټوكېدلي وينم.

بس ده نور نو لاس راڅه واخله او دخلاصون لار يعنى د مرګ آرامي غېږي ته مي وسپاره چي ستا دا احسانمن او درانه پېټى مي نور داوږو څه  لېري شي.

پرېميږده چي نور و نه زورېږم.

پرېميږده چي نور د نامراده او زورېدلو لپاره ونه ژاړم.

پرېميږده چي نور د زمانې دخدايانو د ستم څخه خلاصون ومومم كومو چي مي د غرور سر د ځان په وړاندي ټيټ غوښتى .

پرېمېږده چي نوره مي درد و ستم ځپلې ارواح د نجس كالبوت له محبس څه ازاده شي

څومره سپېڅلې معنى ... ازادي ... د ارواح ازادي ...

هو! دهغي ارواح ازادي چي د نجس كالبد په محبس كي د رنځ، غم، كړاو او ستم شپې دهغه مهال په تمه سباكوي كوم چي يوه ورځ به وي د مرګ سپېڅلې پرښته به پخپل ټول عظمت سره راځي د هغي (اتكړۍ) و زولنې به خلاصوي او بيا به د محبس تور او كرغېړن ورونه  دهغې پر مخ پرانسي او دابه په مننه كولو سره د هغې (ارواح) په لور چي مودې مودې يې د انتظار سترګي ورته سپينې وې پرواز كوي .

يوه ورځ به هغه ارواوي سره پيدا كړي ... نور به د حسرت، رنځ،غم،بيلتون،ستم، او بې دردۍ داستان د هغو ارواوو لپاره پاى ته ورسېږي او هغوۍ به د ميني په وركړل شوي مېني كي يوه ابدي مينه پيل كړي. مينه ... هو... ابدي مينه.