د هجر تورو شپو ته يو اميد د سباوون شته
نو ځکه مې په زړه کې هيله پاتې د ژوندون شته
هر څو که مې جانان ده لباسي خندا زده کړې
خو خوى په کې تر اوسه د ساده بوده پښتون شته
ستا حسن مې په خيال کې لکه سيورى راسره ځي
لا وينه مې رګو کې ددې وخت د کوم مجنون شته
په سترګو که راګورې او په خوله راسره خاندې
په زړه کې دې څه نښې لا تراوسه د بېلتون شته
اغيار که مو د مينې مراندې وشلوي په ګوتو
لاهيله مو نقيبه د اشنا د پېوستون شته