ای زما خوږه ربه
ای زما ګرانه ربه
ته خو خبر ېې چې
ته په ما ډیر ګران ېې
ستا محبت زما د زړه د ژوندونو لاره
زه بې له تا نه هیڅ هم نه جوړیږم
او که څه يمه نو دا تورې خاورې
له دې نه غیر نور شناخت نه لرمه
زما عزیزه ربه
ما د شیطان دغه بدرنګه مخ ته مه ودروه
زما ترې کرکه راځي
زما ترې خوف کیږي
ما د خپل رحم نه بې برخې نه کړې
ته خو خبر ېې خدایه
ستا محبت زما د ژوند چراغ دے
زه چې هر څه وینمه ستا د محبت پیرزو ده
ما ځانله پرې نږدې
د وحشتونو په لار
د تورتمونو په لار
چرته چې هیڅ یو مخ بل نه پیژني
چرته چې هر سړے له خپله ځانه ویره لري
چرته چې هیڅ یو چراغ نه بلیږي
خدایه په هغه لاره
ما ځانله پرې نږدې
زما ډیر خوف کیږي
د خپل وجوده ځینې
زما محبوبه ربه
په ما نظر ساته
د خپلې مینې د کرم نظر
ما هم د هغو نازولو غوندې ياد وساته
څوک چې په تا ګران دي
او ته پرې ګران ېې