انار دي ګل سو کندهاره ګوره
ازغن دېوال ته ناست ملنګ دي وایي
ورباندي خاندي پرهارونه د زړه
د غلامۍ سره په جنګ دي وایي
ډېر راتر زړه سو د هلمند موجونه
هیلو نیولی غورځنګونه وهي
سیلاب د وینو کروندې مي غواړي !
هر یو اتل دی چي تېغونه وهي
بیا د میرویس لښکري رابه دي سي
دې توپاني سرکښ موجونو ته ستا
بیا اصفهاني لښکري وبه شړي
بری به راوړي وچ ډاګونو ته ستا
د میوند تر خاوره سم صدقه
نوې ټپه د بغاوت دي اورم
ستا د سورغر تر عظمتونو قربان
د ایوبي غرور عظمت دي اورم
مرور ولاړو سپین مرغان د موږه
ماتي کړکۍ مي رغولای نه سو
دا چاویل چي په جنګ نه ځو د ورور
د توپک نه یو – اور پاشلای نه سو
لوی کندهار چي کندهار مي نکړو
د مرییتوب کیسې اوږدې به مي سي
تر منځ ازغن دېوال ته اور ورکوو
کنې دا کلی ادیرې به مي سي
ننګ د تاریخ- د تاریخ ننګ کندهار
نوی ګرګین په وینو رنګ کندهار
پټ و اشکار ځاله د جنګ کندهار
د احمد پت د توري شرنګ کندهار
ته !کندهاره وینه ، مینه زموږ
ته سلطنت یې د نیکونو زموږ
څوک چي پښتون وي ننګ افغان خوښوي
څوک سي ایستلای تاله زړونو زموږ
(پښين)
